僕之拉麵 (已結業)

去僕之拉麵係因為友人係肉癡，我本來仲擔心緊應該揀好多肉定係多肉，估唔到今期期間限定係好多好多蝦，啱晒我依個鍾意食海鮮嘅。佢由門口開始就有好多金句，特顯出佢哋對自己出品嘅信心同誠意。拉麵舖開咗好多，呢一間裝修簡約得來又幾有日本風味。對一期一會情有獨鍾嘅我，一定唔會放過期間限定嘅食物。實物同埋菜單有九成像真度，8隻灼燒大海老加上三隻香燒蝦頭，原來中間仲有日式叉燒，加埋半隻糖心蛋，真係好豐富，蝦湯好香，可以見到啲蝦頭油浮晒喺面。肉迷友人喺特選拉麵同埋肉愛食者拉麵兩款中掙扎。最後敵不過炙燒伊比利亞叉燒，選擇左特選拉麵，仲揀選左濃湯原味。原本以為腩肉會好肥，點知伊比利亞黑豚肉食起嚟香得來唔膩，而低溫制嘅日式叉燒就更加嫩同埋少脂肪，個豚骨白湯好濃，實在有啲Heavy，如果唔係要減肥一定會飲晒。桃同埋蜜瓜梳打汽水都好好飲有解膩嘅作用。見到枱枱都有點小食，我哋都唔執輸，點左炸雞同埋炸章魚。個炸章魚好香脆但係裏便仲係好軟嫩亂。炸雞好大件要等耐一啲，但係一咬落口就有雞汁流出來，仲要有熱氣添，係值得等嘅。聽到有女仔叫小拉麵，再睇點單紙，原來有小份量嘅面同埋配料，適合細食嘅女仔。