海記合桃坊甜品 (已結業)

去完齒留香食叉燒飯，見近排少食甜品，心血來潮想食就揸車落去太子，睇吓有咩甜品屋糖水店，再順道落金魚街買水草.正正泊咗係海記，咪走入去幫襯囉.啱啱去完台灣食芋圓，就點個芋圓綠豆西米露同香芋雪樂冰芋圓西米露，比較一吓香港芋圓同台灣芋圓有幾大分別先.先講個雪樂冰先，外相成個雪糕球，咁當然唔係雪糕球一個啦，食上去同雪糕口感完全唔同，似雪葩，論味道夠味嘅，論口感，個人喜好中意雪樂冰哩種口感多過雪糕，所以更啱自己口味.芋圓比台灣甜，我中意食濃味，所以海記嘅芋圓絕對啱我口味.最失望係個綠豆，料足但味淡，係我食過最淡嘅綠豆，失望.最後，極之滿意佢地d冷氣，凍到格離枱四位中女嗌頂唔順唔幫襯轉場，唔怕凍嘅我覺得啱啱好囉！