呢句說話黎緊每次都會講架喇: 我唔係食家, 文筆唔好, 只係將自己覺得好唔好食既感覺寫出黎, 味道呢樣野好主觀, 喜好亦各人有各人既口味, 我係寫比自己睇, 你鍾意睇我會高興, 你唔同意亦無問題, 最後一句講哂: "好唔好食又睇落去"!
拉麵味道好唔好, 係好睇個人口味! 拉麵既粗幼、湯汁既濃度、配料如何...各人食落都有唔既感受, 所以好難一概而論好唔好食。所以呢一篇拉麵食記, 純粹個人觀感呢! 好唔好食? 又睇落去?
近年喺香港, 都試過廿零三十間打正旗號 sell 日本拉麵既食店, 因為呢幾年無寫 "好唔好食? 又睇落去?", 所以都無影食物相, 不過好味同唔好味既拉麵大致上都記得。黎緊我會為每次食既拉麵作一個連載, 名為 "好孩子香港日本拉麵道場小戰爭"! 個名夠哂低能! haha...而今次食既係...
好唔好食?又睇落去? 第333回 香港日本拉麵道場小戰爭(2) : 銅鑼灣博多拉麵別天神拉麵有星變星!
地址: 銅鑼灣告士打道277號地下3A號舖
閒日食晏時去銅鑼灣呢間 "別天神" 食拉麵, 呢間係博多風味, 店舖開放式, 無大門同玻璃隔住街同店鋪, 結果出事喇! 點出事? 睇落去?
上次喺"富士山 55" 食完個蝦拉麵念念不忘, "別天神" 亦都有所以一試!
店內格局似日本, 排位係反 "L" 字形, 天氣熱我行到最入進食!
好! 同師傅落單既同時, 需要找數。
跟住等麵到, 周圍望下, 廚房大湯爐裡面既豬骨係有 D 日本 FEEL! 其實應該夜 D 黎, 個湯應該煲得夠火喉得多!
上麵!
我點既係蝦味噌豚骨湯麵!
第一個動作當然係試湯!
都係嗰句湯既濃度好個人口味, 我鍾意再濃 d, 加 d 芝麻, 蒜蓉, 少少唐辛子香啱口味!
注意: 半熟蛋要加 $10
特意聞聞蝦既氣味, 我記得喺日本第一次食蝦拉麵, 店外已經聞到蝦既氣味, 湯底同用料全蝦, 當然呢個係蝦味噌豚骨, 唔係全蝦, 我只係想借 D 蝦味懷念一下日本既味道...嗚哇!!!
叉燒...比較鍾意有 d 脂肪既多 d!
撇除我比較鍾意粗麵因素, 呢個幼麵略嫌"粉"了一點...
最後食完麵飲緊湯之際, 竟然有隻烏蠅喺度 "除襪"! 後腳係咁刮下刮下! 相信係因為店舖中門大門, 街外既蟲蟻可以爬飛入黎...
總結:
麵再好, 味道再好, 衛生唔得都好大件事...
環境:♥♥
衛生:♥
服務:♥♥♥
味道:♥♥
抵食:♥♥
推薦:♥
