雲南風味 (已結業)

自上次與openrice食友横掃餐牌後一直念念不忘,上星期晚上返工前心思思想食雲南菜，男友未食過又得閒陪我食,好興奮的去了。約八時許,都有七、八位客人。兩個為食的人點了麻辣雞米線、煎羊乳餅、紅油抄手、夫妻肺片、炸臭豆腐及清燉羊肉(好似好多,但其實每碟的份量不多)。麻辣雞米線要了中辣。都幾麻辣,湯底清清地,雞肉細細粒帶骨,個人覺得譚仔好食啲。煎羊乳餅嗅下羶羶地,食落去質感像芝士,有點香香的羊奶味又不太羶,是我至愛之一。紅油抄手好細隻,肉饀不多,皮則好滑溜!加上甜甜地辣辣地,很開胃。夫妻肺片有豬耳、豬脷、肺片等,不太辣,普通了點。炸臭豆腐無坊間的咁'臭',但略嫌炸得太乾身,硬咗啲。清燉羊肉要了小鍋,湯好鮮甜無味精,帶羊羶味,怕羊者末必啱口味。羊肉嫩,肉多脂肪少。喝完好暖,驅寒最好。埋單約$120,幾抵食又正宗，必會再翻炒。