泰Cool

营业中

休息中

聽屋企人講呢間餐廳好好食，但睇食評就好一般，一於同朋友試下先，而且佢有波睇，仲大電視，好吸引！入去坐低，職員即刻帶位，為左睇電視，見到有個客啱啱走，未執枱都坐埋去，職員即刻幫手執乾淨，仲好細心抹，加分。啲野食幾吸引，叫左椰青海鮮飯，小食拼盤，馬拉盞炒雜菜。椰青海鮮飯：本身以為同其他餐廳一樣，細細個得一兩碗飯。點知一上枱，OMG! 巨型椰青飯，我估有4碗飯左右，佢仲將開椰青既椰青水俾埋你，我從未見過有餐廳咁好，變相送左一杯飲品。椰青入面啲炒飯好好食，用椰青肉炒，所以有椰青味。如果海鮮一齊炒，會效果更好。小食拼盤：呢個都唔錯，蝦餅同魚餅都好食，唔會好粉。馬拉盞炒雜菜：朋友想食雜菜，我想阻止，因為通常出面餐廳既雜菜都唔好食同唔新鮮。但係呢間泰菜既雜菜都好新鮮，馬拉盞好夠味道，又有炒既獲氣，一改我對雜菜既感覺。整體成餐飯都好好味，環境好闊落，又靚，唔明點解咁多負評，佢既質素好過淘大另一間泰國菜。將來一定會再試下佢既其他菜式。