泰豪燒 (已結業)

今晚同老婆去元朗行街，係元朗西鐵站附近搵到間幾特別既餐廳-泰豪燒。餐廳主要分兩邊，燈光較暗，每張枱位置都分得幾開，環境舒適👍🏻。一坐底職員就介紹一下餐牌食物，仲會推介受歡迎既菜式以及時令海鮮配料，服務都幾周到。而餐牌上既串燒有廿幾種可以揀，又有唔同既小食，選擇都唔少😁。之後我地決定要個二人餐：一鍋2餸海鮮粥，同埋6款串燒，再加一支大啤。隨即見到，飲品竟然有買少見少既「黑松沙士」😂！忍唔住再叫飲品。由於佢係即叫即燒，制作需時，大約等左15分鐘到食物就到。首先嚟咗六款串燒：雞肉、牛肉粒、豆卜、花枝丸、芝士丸。每款串燒都灑咗密密麻麻既孜然粉，加埋啱啱燒完既香味，非常惹味！值得一提係花枝丸同芝士丸，燒到又香又脆，但入面仲好彈口，唔會燒到好乾，我個人最愛😍。等多陣，主角海鮮粥就黎啦。配料方面㨂咗奄仔蟹加花甲，因為職員都推介奄仔蟹多較多膏多汁，煲粥會更加入味。果然無介紹錯！海鮮粥好夠鮮甜，唔會太咸或者太濃味，而且好夠蟹味，非常鐘意！攪起粥底仲有好多花甲，好足料。一鍋粥兩個人分，每人都有成三大碗，絕對會飽到上心口。所以，如果大家真係食唔晒，可以叫個外賣盒拎走，咁就唔使浪費啦🤗。