蟹仙海鮮蒸氣鍋 (仁愛街) (已結業)

今日去完新蒲崗做嘢之後，難得香港恢復返晚市，就一於決定同朋友食好啲，咁我哋兩個都係海鮮嘅愛好者，一於就揀個蒸氣海鮮食啦。因為食蒸氣海鮮先食到新鮮最原汁原味嘅海鮮。跟住跟住搵吓附近，就搵到蟹仙呢一間。聽店員講佢哋嘅海鮮係直接老闆批發入口，所以都係比較新鮮同靚。我哋叫咗399嗰個餐，其實都已經好多嘢食，特別推介過奄仔蟹，超多膏 多膏得來亦都好濃，濃到好似食緊鹹蛋黃咁。另外龍蝦啲肉亦都好多，好厚肉。全程所有海鮮都係由職員幫手，蒸幾耐全部都唔使我哋自己理，坐喺度等食就得喇。最後食埋個海鮮粥底簡直一流，我哋擺埋個龍蝦頭學落去一齊煲粥，啲粥好有海鮮味。之後仲有飯後甜品，係椰汁雪燕燉燕窩，為呢一餐畫上完美嘅句號。最後另外值得一提係，雖然而家恢復晚市，但係肺炎依然，喺呢一度佢亦都會用蒸氣幫你蒸埋啲餐具，食得放心。