餐廳環境光鮮，枱與枱佈陣密。牆角有梳化，坐位比較寬鬆舒適。
望望餐牌見選擇甚多，新張期優惠各式河粉都只係三十蚊，其他小菜價錢唔貴，唔小心叫左成枱野，埋單都只係三百蚊，算經濟實惠。
招牌生牛肉湯河粉 $30
賣相吸引配料金不換芽菜都見，湯底色清但入口牛骨味很濃，牛肉呈粉紅薄身，肉質鬆化有肉香。河粉爽彈幼滑，三十蚊碗份量足，超值好食！
香茅豬扒撈檬粉 $30
豬扒厚度有番咁上下，而且份量多相當慷慨，大半碗都係豬扒。豬扒肉質鬆軟，輕輕一咬好易撕開，香茅味滲透肉內好香好入味。檬粉除左有生菜絲外，仲有甘筍絲、青瓜絲口感豐富，淋上碌冧青檸榨汁，成碗粉相當美味，大大碗又係抵食到你唔信。
扎肉蒸粉包 $28
賣相精緻，粉包兩件趁熱食，扎肉放面蔥花炸蒜片灑上面，粉皮厚咬落彈牙，內餡有木耳絲甘筍絲沙葛等，餡料爽口富口感。
千島雞翼4件 $42
平均十蚊隻雞翼不算便宜，難得侍應推介就試試。雞翼面層嘅秘製千島醬汁確係美味無盡，醬汁甜美味道豐富，幾乎沾上咩食物都變得好味，何況係雞翼，雞翼得四隻食完有點唔夠喉，侍應果然介紹無錯，唔點會錯過。
椒鹽軟殼蟹 $128
來了先知大份，份量啱四人食，比較重口味好惹味，齋食兩件會好溜，伴檬粉食比較合適。
馬拉盞灼通菜 $28
又係抵食好味之選，灼通菜無咁油夠健康，通菜撈埋馬拉盞異常地好味，陣陣鹹香唔係好鹹非常惹味，再飽我都食埋最後一條菜。
菠蘿熱情果特飲 +$12
味道甜甜地酸酸地，凍飲清甜可口，飲落幾開胃。
椰汁珍多冰 +$12
落了好多椰漿好多冰，味道唔算好甜，杯底好多條珍多，間中飲到有得咬下好滿足。
餐廳暫時未見座位滿坐，剛開業應該無咁多人知，相信不久會客似雲來多人排隊等位，所以我都要介紹左朋友捉緊優惠，早食早享受。
