龍鳳號 (已結業)

同事介紹呢間食台灣嘢嘅炸雞脾，據聞又脆又大隻，所以Lunch time即管一試。 間店唔算好大，唔想等大耐最好1點前到喇😉見到點餐紙雖然有其他好似好好味嘅選擇，但係今日係為炸雞脾而嚟，唔食點得呢😅我點咗炸雞脾配肉燥乾拌麵，賣相相當唔錯。除咗炸雞脾同肉燥麵之外，仲有湯同埋冷盤小食。隻炸雞脾係已經去皮先炸，炸漿超薄脆口，好似食緊薯片咁，表面灑咗啲似係鹽酥雞嘅味粉，咸咸哋幾好味。肉燥好香，撈埋啲麵好好食👍🏻食完呢個餐已經飽到行唔郁，唔好睇少隻雞脾，真係好大隻😅聽講佢哋嘅楊桃汁同烏梅汁都唔錯㗎，加$9就有一支，食得太飽嘅話可以幫助消滯😜今次我就無試，下次一定要試吓。