小曼谷泰國美食 (已搬遷) 新店位置

聽朋友話小曼谷D野好食，但好滿，做埋今晚又內部裝修，咁一於趁早同老公去撐吓檯腳啦。為免向隅，知佢地六點開，咁未夠六點就去到等。人地五點搭十一開門，我地就即刻入去坐定定等食嘞。食到七點左右己經全場滿座，門口仲有班人喺度等位。我地好彩到得早，有卡位坐，都算舒服啦。幫我地落單個侍應冇咩笑容，慒口慒面咁，但上菜同收碟嗰個幾好笑容。我地驚佢地裝修冇得食，所以今晚最後衝刺，佢又介紹我地去附近佢地另一間細D嘅舖，幾好傾呀。我地得兩個人，唔食得多，只係食咗：生蝦沙律（八只）：爽甜彈牙，D汁酸酸地，少少辣，好開胃，好味；咖喱蟹（一只）：隻肉蟹D肉幾甜，算幾大隻，最好係連個殼都少少膏，D汁幾香滑；蒜蓉法包（四件）：熱辣辣嗰陣食好脆，點咖喱蟹D汁食最啱。但擺耐咗就韌晒；泰式炒蜆（十一大只）：好似貴妃蚌咁大隻，鮮甜爽口又冇沙。但D洋葱唔掂，變變地味，青椒又淋晒；杧果沙冰：好香杧果味，唔太甜，真材實料；椰王沙冰：椰子味好濃，都係真材實料；杧果糯米飯：杧果甜，D飯更甜。白糯米軟滑，黑糯米煙韌，椰奶又香，熱辣辣，真係好好味！食到最後，爭D飽到上心口都唔捨得唔食。兩個人食咗三百零四蚊，畀咗三百一免找都仲覺得好抵食呀！