第一印象：位真係窄到呢！四人枱如果坐滿，手踭基本上係「近身接觸」，講真有啲拘束。
塔台都算常見，但最尷尬就係一個人對住三個人嗰種，氣氛微妙到爆。
落單用手機，呢點幾好，客製化做到幾盡：芫茜、花生、酸菜要幾多任你揀；辣度由BB辣到地獄辣都有；米線軟硬都可以點。
點一人餐仲有小食加飲品
當日見隔離枱幾乎個個辣到面紅耳赤、邊食邊抹汗抹鼻涕，似乎好多客都係為辣味而來。
我唔太食辣，揀咗BB辣，食落唔會出汗，算舒服。
不過有啲位真係失手：我特登揀「多花生」，但成碗都搵唔到半粒，懷疑廚房當咗「走花生」。配料叫腩肉同豆卜，以七十幾蚊一碗嚟講，份量偏少；米線份量就正常。相係食之前影，唔係我偷食，但賣相同隔離枱有啲唔同，唔知係唔係出餐時有差異。
味道方面，我會形容為「過得去」：湯底唔差但未有記憶點，唔至於去到「唔食會掛住」嗰種。
環境就比較扣分，座位逼、坐得唔太舒服，女士連放手袋嘅籃都無位。
總結
優點：點餐彈性大、客製化夠貼身；辣度選擇多，愛辣人士應該中意。
缺點：坐位好逼、配料份量偏少、出餐穩定性一般；「多花生」失蹤要扣分。
推介指數：想試辣味可以一試；講求整體舒適同性價比的話，未必會特登回頭
