象屋泰國餐廳 (已結業)

MOKO餐廳都幾多選擇，放完工想搵一啲舒服環境嘅地方食餐晚餐，而今晚又想食泰菜，所以就揀咗呢一間象屋，望到餐牌嘅選擇都幾多下！食完覺得呢一度嘅泰菜都算高質，好味而且價錢中等，坐得都舒服，都幾啱一班人聚會。柚子青芒沙律份量都算幾大份，尤其是青芒，真係有好多芒果條，食落爽爽脆脆，本身帶點微微既生果酸，再加上柚子同沙律汁，酸味味帶點辣，好開胃，仲有蝦乾，真心覺得依個沙律好正😛馬沙麻咖哩牛依個牛真係必點😍😍平時都係多數食青咖喱、黃咖喱、紅咖喱，馬沙麻咖喱唔係周圍都有，而且呢一個咖喱係一定要配牛食。咖哩用小鍋上，仲有一個蠟燭仔heat住，所以唔會攤凍變傑哂，個牛真係令我印象10分深刻，肉質炆到好淋，食落有種即融感覺，而且份量好多，食極都仲有好多舊咁😂😂馬沙麻咖哩味道豐富濃郁，辣度相對溫和。配埋油酥餅真係無得輸，酥餅鬆脆而不油膩，好食啊配咖哩！菠蘿炒飯一樣份量都算大，用左半個菠蘿殻上作點綴，大量肉鬆同腰果鋪面😍炒飯裡面加點菠蘿，炒飯裡面就多了一份果香，再加上泰式臘腸既咸香，成個飯既口感都好豐富，飯炒得唔錯，比平時既菠蘿炒飯炒得更入味！