愛上米線 (波斯富街) (已結業)

喺銅鑼灣波斯富街見客見倒大大間新開的米線店，餐廳主打雲南米線，餐牌寫住每日新鮮湯底冇味精幾吸引，立即同同事買返公司試下，湯頭可以揀豬骨或牛骨湯，除左湯米線，仲有撈米線同泡飯選擇，價錢親民，加$18仲可配小食及飲品，如果堂食仲可以免費添加米線或飯！全黑白嘅裝潢充滿復古嘅感覺，外賣包裝企理，讚👍 🍜紅燒排骨湯米線🍖$58 奶白色嘅豬骨湯底香濃唔油膩咸淡適中，排骨忟到好淋好入味又帶點咬口，啱哂鐘意食半肥半瘦嘅人，米線彈牙，配埋香蔥同芫茜一齊食更惹味！🍜紅燒牛𦟌湯米線🥩 $62紅燒牛𦟌配牛骨湯，雙重牛味更香更濃郁！飲一啖湯頭再加一啖米線簡直冇得彈！紅燒牛𦟌帶點微辣厚度適中，肉質煙韌相當好味！ 🍚 酸菜肥腸泡飯  $58用上日本米嘅泡飯真係好好食！肥腸炸到香脆，夠哂肥美又入味！酸菜湯泡飯中和左少少辣🔥出奇地夾！小食點左炸蝦醬雞翼$28同剁椒皮旦 $24， 兩樣都好食，性價比好高！