土司工坊 (已結業)

約左朋友，又未夠鐘，咪上openrice睇下有咩食！見呢間野評價唔錯，作為下午茶，價錢優惠，同埋嗰個半生熟蛋好似好正咁，好有想試下！行到去落order,要了一份傳統吐司餐，服務員問我要咩蛋，我話要半熟蛋！俾完錢，等飲品時，我望一望張單，寫住全熟煎蛋，咪想問一下，點知個飲品調製員，好似趕狗咁，叫我坐低等！我忍唔住，同佢講出：『我想問下呢，個蛋呢，我想要係半熟蛋嗰個！』佢望一望張單就話，『你要係全熟煎蛋喎，坐低等！』最後連送野食過黎嗰個都係黑口黑面！我真係覺得自己似係乞食咁！講返食物！件多士都ok,係厚左小小，但個咖央加牛油真係唔錯，而對煎蛋呢，應該煎定左好一陣子，只係暖暖哋，同埋比較硬！杯咖啡都ok,無酸味，但唔知點解，飲到一半，杯冰已經差唔多溶晒！另外有一件事令我有小小介意，廳面廚房嗰兩位女仔頭髮頗長，長長既馬尾外露而唔套喺帽入面都唔緊要，佢哋仲要每幾分鐘就搞d頭髮一次，我睇多兩次，望一望杯咖啡，有一點噁心既感覺！飲品自然飲唔落去！