麥當勞 (長發廣場)

营业中

休息中

早輪麥當勞同出前一丁聯乘合作，推出出前一丁系列shake shake粉，同時出咗兩款新包。幫襯開麥當勞嘅我都想轉下口味，唔好成日淨係食bbq味shake shake薯條。而包我就揀咗宮崎風味南蠻炸雞漢堡，仲加配咗新推出嘅蘋果特飲，點知就中咗伏。宮崎風味南蠻炸雞漢堡廣告話呢款包有南蠻醬同炸雞扒，另外混搭蛋沙律、洋蔥同椰菜絲。雖然個盒幾靚仔，但一打開個包，個賣相扣哂分。醬料太多，炸雞飆哂油，成張包裝紙都污糟哂。雖然我係外賣自取，但只係短短3－5分鐘路程，正常唔會令到個包賣相咁差。至於味道，炸雞好乾身同較硬，唔juicy。南蠻醬係酸酸甜甜，但無助個包提升鮮味。Shake Shake薯條（出前一丁黑蒜油豬骨湯味調味粉）網上有唔少人話呢包粉太鹹，所以我只係落咗7成左右。老實講shake完之後唔太食到有豬骨湯味，比起黑蒜味，更多係味精嘅味道。大大杯富士蘋果特飲特飲幾清新，酸甜度適中，有消暑作用。飲個陣唔太食到果粒，要去到尾自己用飲管整先食到。