富臨 (已結業)

今日下午4姨媽約咗我們嘉湖銀座嘅「富臨」一齊飲下午茶！我們叫咗魚茸釀茄瓜嘅魚肉唔算好厚身，味道亦有啲腥，而茄子就唔算好軟滑，質感有啲硬身！家鄉煎薄𦉘嘅餡料雖然都幾豐富，質感都幾煙韌，但就煎得唔係好香口，感覺好似食緊「嚿」仲未煎熟嘅麵粉咁！南瓜煎堆仔嘅外層好煙煙韌韌，入面嘅南瓜蓉嘅味道都幾香甜，但份量非常少，差唔多係空心咁，真係令我們覺得好失望呀！鮑汁叉燒包嘅包質都算香滑軟熟，鮑汁嘅味道都幾惹味濃郁！蔥花炸兩腸嘅腸粉外皮好軟滑，入面嘅炸兩亦炸得好金黃香脆，個名話係蔥花，但一粒蔥花都無，真係又再一次令我們覺得好失望呀！銀芽肉絲煎麵嘅麵煎得都幾香口脆身，肉絲都幾爽滑，而且份量都算多，特別係銀芽，簡直係超級多！