滿江紅 (已結業)

是晚跟男友同大佬係附近商場亂逛完，近11點見肚餓，辣椒又再次使用絶招1拖2拉咗佢哋上滿江紅.上到嚟，侍應話要快啲落單，廚房就收，咁我哋就快快點了辣子雞，毛血旺同滷水双拼再點了啤酒。辣子雞好快上枱，但令小妹出奇嘅係點解會有孜然粉嘅，以前嚟食過好似冇喎，而且其他打川菜牌頭嘅餐館都唔會落孜然做辣子，真係諗唔明。這份辣子雞用上大量辣椒同花椒，但花椒太多太麻，其他辣味，雞味全部冇哂，只食到麻同孜然粉，小妹認為應改名為孜然花椒雞碎配干椒(裝飾)。呢碟so call 辣子最好食嘅係腰果，除咗腰果，啲雞太碎，而且多碎骨，食佢一定要小心食。分分鐘要用手搣走啲碎骨先可以食，但你同時又要大大啖飲啤酒沖淡麻味，係咪好忙呢！好彩有叫到滷水双拼，甜滷水幫忙減淡麻度，可惜我已經食唔到當中嘅滷水味了，因為我已麻到冇哂味覺最後嚟嘅毛血旺，毛血旺冇咩底味，唔辣，可能原本有嘅，只係我已麻到食咩都冇味，嬲死個辣子雞呀。另一樣唔開心係唔見咗我愛嘅午餐肉，換嚟薄薄細細嘅火腿，好彩仲有芝士腸填補返心靈空虛。。。整體 嚟講，除咗麻，冇咩其他味口。