果子｜海南雞飯·喇沙摻摻 (啟昌樓) (已結業)

好幾年前黎食過肉骨茶，味道好正宗。今日黎開附近，就再一次幫襯呢間餐廳。晚上7點左右到，已經好多人等位，幸好裡面位置都唔少，等左15分鐘左右就有位。餐廳嘅食物好多選擇，除左招牌海南雞飯同火山包之外，仲不時會推出一d新菜式。（本來想點軟殼蟹火山包，點知當日已經賣曬，下次要早d黎）。無骨走地海南雞飯（$72）走地雞比一般嘅雞少d脂肪，雞皮晶瑩剔透，爽滑彈牙。雖然比平時嘅海南雞淺色，但一樣入味，而且雞髀同雞胸部位都有，油飯粒粒分明。另外點左3個小菜~星洲牛肉炒貴刁（$74）睇落有點似乾炒牛河，但其實味道係類似泰式炒河偏酸甜，牛肉係用左薄肥牛，另外仲有牛丸、炒蛋、沙律菜同檸檬等配料，幾開胃。小食拼盤（$62）有南乳雞翼、吉列蝦、春卷同香辣魚餅。其中春卷特別好味，外層係脆口嘅炸網絲，入面有大量芋頭同薯仔。蒜蓉炒通菜（$50）小鐵鍋上檯，好有鑊氣，通菜炒得剛剛好，咬落爽脆，而且份量好多，以呢個價錢黎講好抵。紅豆薏米水(跟餐$8)、美祿恐龍(跟餐$12）紅豆薏米份量唔少，味道唔甜，比較健康。美祿恐龍上面有大量美祿粉，就咁用匙羹食都唔錯。