京林屋 (明宮閣) (已結業)

京林屋係京都有名嘅抹茶老店之一, 擁有超過二百年歷史, 今日就嚟朝聖一下。餐廳除咗著名甜點之外亦有供應熟食。我同朋友一人叫咗個京式鰻魚飯 。原條鰻魚伴鮮黃色蛋絲, 一上枱已經相當奪目, 鰻魚肉厚, 油脂唔係非常多, 但咬落富彈性, 配上蒲燒汁, 拌飯一流。玉露玉艷玉露係綠茶之中嘅極品, 不能抵受高溫, 用攝氏50度嘅溫水泡一兩分鐘就啱啱好。呢個份量嘅茶葉只供沖泡3小杯。飲落茶味香醇不澀。淨返嘅茶葉加入柚子醬油,重可以當成小食, 茶葉食落鮮嫩幼細, 沒有一絲苦澀味。香港限定巴菲層次分明, 一次過食盡, 抹茶軟雪糕、抹茶蕨餅、白玉丸子、紅豆、 草莓醬 、寒天....每層都有驚喜! 主角抹茶軟雪糕質感幼滑, 茶味香濃入口回甘, 抹茶控必點!焙茶巴菲雪糕冰感較強, 散發淡淡烘焙香, 層次無抹茶巴菲咁豐富, 整體甜度較低, 不嗜甜都啱食。