阿爺粥品手工涮涮鍋 (已結業)

天時暑熱，好多人都唔太想食飯，成三十幾度，食乜最好？我自己就比較喜歡食粥粉麵，原因係濕潤好多，唔會好似食飯咁乾。你可能會話，粥咁熱，食完都滿身大汗啦，可能係嘅，如果你坐街邊喺冇冷氣嘅大排檔食粥的話，食完一定成身濕哂，同冲完凉無分別，不過如果可以坐喺冷氣夠勁嘅室內座食粥，粥涼得比較快，其實係非常啱夏天食嘅，早幾日中午就去左食阿爺粥品，揀佢嘅主要原因，係佢地係賣粥底火煱，所以冷氣特別夠勁，室温一定比普通賣粥地方低好多。環境寬敞，到達時係中午兩點幾，過左食飯時間，人好少坐得非常舒服。午市粥餐有4款選擇，見倒有個蝦蟹海鮮粥就點左，配混醬腸粉一碟。混醬腸粉用嘅麻醬夠靚，所以好夠香味，醬油鮮味，粉又爽又滑溜。粥夠綿滑料幾多喎，蜆夠鮮嫩唔韌 ，基圍蝦爽甜。越食越想食，碗粥食到一半嘅時間加左一碟韮菜豬肉製名為順德春花卷小食，炸得超香酥，肉亦有咬口嚼勁，原來阿爺啲小食都有好高水準喎。午餐食簡單野，已經咁有水準，下次我一定會再試下個粥底邊爐晚餐。