和順記 (路德圍) (已結業)

一直知道呢間店有勁大隻炸雞脾！今日下午茶好肚餓，就去試一試！舖頭裝修10分簡約，點餐竟然係用智能系統， 10分新穎！餐牌內容有點複雜，叫餐時有點不知所措，幸得員工細心教導，終於成功叫餐。估唔到呢間除咗食炸雞脾外，仲有好多唔同嘅選擇，見到佢有豬膶薑米湯米粉，呢啲乍暖還寒嘅天氣啱晒嚟暖下身。叫咗一客，配上薯角。當然唔少得要叫雞髀，特別叫咗新疆辣味，希望可以暖一暖身！估唔到呢度仲有老火湯可以叫，有杏汁豬肚湯，梗係叫過嚟滋潤下啦。雞髀先上枱，嘩！真係好好好好大隻呀！熱辣辣㗎 ！不過店員唔記得咗幫我落辣粉，佢哋好快好細心同即刻同我加返辣粉上去，隻雞比即刻野味晒！雞皮吹卜卜，肉汁鮮嫩，雞髀真係超級大隻，勁香口！一個人真係食唔晒，好彩我同朋友一齊嚟。薑米湯豬潤米粉係極其好味，嗰薑米湯我忍唔住要飲晒，因為實在太鮮甜啦!最後，一定要講吓佢個杏汁豬肺湯，湯有濃濃嘅杏仁味，極度濃郁鮮甜，有點飲糖水的感覺。豬肺好乾淨好新鮮，入口軟綿綿，吸盡湯汁，真係極好飲，飲完個肚暖粒粒，有一種極補身嘅感覺。食完邪惡嘅炸雞脾，飲返個健脾開胃嘅湯，成個人平衡返。真係非常之滿足嘅一個下午呀！