麥金.麥金馬來西亞特式茶啡室 (已結業)

娘惹叻沙，喇沙味道十分正宗，有住香濃嘅椰油香味，味道唔會話好辣，仲有大大隻嘅鮮蝦，爽口彈牙。仁噹牛肉配椰漿飯，椰漿飯嘅椰漿味道未算好濃，可能因為隔離紅色個醬汁搶咗個味，不過攞個紅色汁嚟撈飯食都相當啱feel，牛肉用嘅係牛腩位置，充滿咬口，有少少似巴東牛肉嘅意味，伴碟帶有蜜味嘅小魚同埋脆到無朋友嘅花生，亦都為呢一個飯生色不少。蛋黃奶油花甲，見餐牌有青辣椒黑胡椒甘香同埋呢個蛋黃奶油花甲可以揀，初時都有啲心大心細，既想食黑胡椒嘅香，又想揀青辣椒嘅辣，不過最終都係揀咗呢一個咁特別嘅蛋黃奶油，貪佢唔係度度有得食；花甲嘅味道既有蛋黃奶油嘅香，亦有紅辣椒嘅辣，係一個味道好創新嘅炒花甲，絕對衝擊你嘅味蕾，值得一試。檳城香炸滷肉卷，滷肉卷嘅外面係炸到脆卜卜嘅腐皮，裏面包住飽滿嘅肉碎同埋一啲好爽口嘅粒粒，個口感有啲似粉葛，香脆得嚟又夠惹味。桔仔話梅水， 我好鍾意呢個桔仔話梅水， 佢個甜度啱啱好， 有好清香嘅桔仔味， 酸酸哋十分開胃，愛酸嘅朋友飲完仲可以食埋粒桔仔，異常咁生津。