悅知味中泰越風味融合菜 (裝修中)

大窩口港鐵站A出口國瑞路果邊主要係村屋，一般人應該好少知道原來港鐵出咗行幾分鐘，喺縉庭山果邊，有間兩層高面績好大嘅中泰越菜館。餐廳係新式中菜館嘅裝修，又帶有東南亞風情，整體闊落乾淨。侍應姨姨都好有禮貌，感覺好和善。拎起餐牌見到有好多泰國菜式選擇，仲有中式家常小菜。食物價錢合理，而且味道賣相都幾唔錯，性價比好高！✔️新鮮柚子鮮蝦沙律$88非常鍾意呢個沙律，酸甜汁、辣汁刺激味蕾，令人好開胃！加上柚子自然嘅果香清甜，蝦嘅鮮味，成個沙律感覺好清爽！✔️泰式菠蘿炒飯$108 呢度嘅泰式菠蘿炒飯冇用菠蘿盛裝，但係味道同喺泰國食到嘅好一致，配料豐富，有溫和咖喱香，又有菠蘿粒、葡萄乾嘅酸甜。✔️馬拉盞炒通菜$88 通菜好入味又夠鑊氣，散發馬拉盞醬鹹香，辣味適中不搶喉。菜莖清脆、葉片柔嫩。加入咗肉碎、炸蒜等，層次豐富。擺碟集中唔散亂，賣相不俗。✔️三色冰$18（跟餐特飯價錢）椰漿味道香濃，三色馬蹄外層煙靭香甜，內層爽口，顏色繽紛。✔️杞子桂花糕（贈送）食完飯仲有甜品送！香港人對好食甜品嘅評價係「唔係好甜」，呢個桂花糕真係好微甜，突出咗桂花清香，入面仲好有心思加入咗龍眼肉粒。