滿屋日本料理 (已結業)

想盡情食日本野，放題一定係最抵嘅選擇。位於銅鑼灣廣場嘅滿屋一定可以滿足大胃口嘅你。呢度嘅刺身鮮甜，特別係大大隻厚肉帆立貝同埋清新爽甜嘅甜蝦，令人想不停N call。不得不讚呢度嘅壽司，款式既多樣化又能夠保持水準。推介炙燒和牛壽司(牛肉超多油份又嫩滑)、一口蔥吞拿魚蓉帶子、蔥三文魚腩壽司、火炙芝士蟹棒尋司、海膽手卷等等。炸物方面有芝麻炸雞翼、吉列蠔、炸芝士球，香芋球等。仲有各式天婦羅如炸蝦天婦羅、茄子、蕃薯等，全部即叫即炸。燒銀鱈魚同埋燒雞軟骨十分好味道。牛肉壽喜燒，份量比較多，加入溫泉蛋令牛肉口感十分嫩滑。除左點餐紙上嘅食物外，public area有唔少冷盤/熟食可以選擇。飲品區飲品種類多不勝數，實有一款岩飲。除左汽水/果汁之外，仲有熱茶同清酒，同埋點餐紙上嘅一些特飲。每人可揀一款雪糕，佢嘅甜品味道一般，唔太recommend。而雪糕機嘅自唧雪糕味道唔錯，食埋甜品大滿足作結。