大瀛喜日本料理 (已結業)

好耐冇同朋友去食飯，方便大家收工就腳，就揀去旺角食放題。平日8:30pm後都幾抵食，佢係自助網上點單，另外有前菜、飲品、甜品喺出邊自己拎。除咗無酒精飲品，佢仲有冷、熱清酒同梅酒，試咗一杯梅酒，味道不錯。刺身拼盤好快到，擺得好靚，最鍾意食北海道帶子同甜蝦。熟嘅海鮮都好多選擇，一定要試蒜蓉烤扇貝、黃金醬燒開邊蝦、黃金炒大蝦，全部都好入味，黃金醬開邊蝦個名好特別，第一次食好好味。仲有放題必食嘅芝麻雞翼，雞皮烤到好脆，入面嘅肉好嫩滑。食完好多肉要食返啲菜，佢嘅燒新鮮菠蘿好甜，牛油燒翠玉瓜就好多汁好惹味。最後食飯一定要留肚食甜品，佢呢度有好多款雪糕同埋雪條。然後呢個杯裝嘅雪糕標榜低卡路里低糖，仲要係香港製造，食咗好多個味好好食。