極尚大瀛喜日本料理

营业中

休息中

好耐無食放題，趁住年尾清假，決定去睇戲前食餐好，來到了大受歡迎嘅「極尚大瀛喜」。平日午市放題只係$258，可以食足三個鐘，有齊刺身、壽司、燒物、炸物及甜品等等，都算抵食。係等食物送上前，可以先出自助區拎d小食醫下肚，除咗傳統日式小食外，仲有少量海鮮及炸物，不過最正都係椰汁燉雪燕，非常足料，真係要飲返兩碗滋潤下。食放題首選梗係食刺身，呢度嘅刺身有好多種選擇，包括我最喜愛嘅油甘魚及希靈魚，每樣刺身都係厚切及好新鮮，入口味道鮮甜，真係叫多幾次都唔嫌多呀。刺身以外，當然要食埋其他熟食同炸物，個人特別推介珍寶燒蠔，大大隻依然保持鮮嫩；而炒牛柳粒味道甜甜辣辣，食得好開胃。另外，喜歡榴槤嘅可以試佢地嘅榴槤燒。飲品亦有好多種，連梅酒及清酒都有，亦有較為少見嘅橙汁及椰青水，仲有熱維他奶等等，天氣凍嘅時候飲就最適合不過啦。最後當然要有甜品時間，呢度嘅甜品有麻糬、布丁奶凍杯、豆腐花、雪糕等等，仲有個自助糖果區，真係食甜品都食飽。個人最喜歡芒果麻糬，細細粒一口一粒啱啱好，味道唔太甜，煙煙韌韌好好味。