Le Viet (已結業)

早几日约左朋友出旺角食晚饭，落大雨所以就走左入银行中心避雨，好耐无走过入银行中心嘅我地发觉原来入面变左好多，仲多左呢间食越南野嘅餐厅，所以就即兴拣左嚟呢度食饭。餐厅新开张不久似乎未有好多人知，当晚人流不算多，空间开扬座位阔落，难得嘅系旺角竟然有如此宁静舒适嘅环境食餐饭。我同朋友都特别喜欢食越式嘅小食，所以我地全晚都主要叫小食为主。首先叫了道烟三文鱼米纸卷，米纸卷就食得多，配烟三文鱼倒是第一次，配撘新颖得来又意外地好味，米纸卷嘅皮又唔会太厚，食落有很fresh嘅感觉。然后上嘅系咸鱼炒芥兰，咸鱼嘅份量刚好，咸鱼味道浓郁又不会令整碟菜变得太咸，芥兰亦用料新鲜幼嫩。我地嘅重点当然就系呢个le viet拼盘，有齐春卷、烧猪颈肉、炸虾饼同越式粉卷，心大心细样样都想试嘅最啱叫呢个！拼盘整体都做得好出色，猪颈肉烧得香口又唔会肥，特别钟意个越式粉卷，有扎肉、菇等嘅馅料，一咬落去馅料多到一下子就爆晒出嚟，加上粉卷皮做得薄身又滑口，味道十分不错。最后来嘅就系我地全餐饭嘅最爱咖哩软壳蟹配法包，咖哩一直用蜡烛坐暖住，咖哩汁做得相当惹味，四大件嘅软壳蟹亦炸得脆口又不失蟹嘅鲜味，浸落咖哩汁更加系一流！