小廚港作 (已結業)

呢一個星期都要留係荔枝角區客戶嘅辦公室，午飯第一時間就係搵食啦，呢區餐廳真係好多，上樓嘅真係多到數唔哂。今日試小廚港作，係長沙灣廣場都幾易搵，1點門口已經有人龍，等咗5分鐘就有位搭枱，睇吓個午餐MENU，再望吓周邊大家食咩先，見到好多枱都係食咖喱，午餐MENU有咖喱牛肉，但係我偏偏鍾意單點嘅咖喱牛排骨。等咗5分鐘就有得食，份量唔細，牛排骨都有5舊，如我所料牛排骨炆得啱啱好，一篤就離骨，又有咬口，牛肉味又夠濃。咖喱汁夠濃又夠辣度，椰漿落嘅份量啱啱好，送飯真係冇得頂！非常滿足嘅一餐，價錢亦都相當合理，希望呢個星期係荔枝角區可以繼續搵到呢D水準嘅餐廳啦！