199海灣燒烤 (已結業)

咁岩去到大尾篤附近開工，返10am放4pm，開工之前老世叫我地帶定啲麵包乾糧同水咁，驚果邊得d燒烤場會無午餐食。點知果日1點幾果陣頂唔順真係好肚餓，就決定行去附近睇下有無碟頭飯食都好。巴希雅海灣燒烤就眾所周知出命嘅燒烤場，原來隔離仲有一間叫199海灣燒烤，同其他燒烤場唔同嘅係，佢地除左可以燒烤，仲有$48午食任食，無錯，係任食！任食！任食OMG！（重要野要講3次😂）係市區茶餐廳$40-$60係正常，呢到$48就有六餸一飲品，白飯同老火湯仲要飲裝，真係抵到爛！岩哂係呢頭好多地盤工人過黎食lunch，食飽先有氣力做野😆呢日嘅菜單有豉汁排骨、三色水蛋、西芹炒豬頸肉、油麥菜炒魚鬆、紅燒豆腐魚塊同菜膽雞，老實講，出面就算要食咁多餸都一定唔至呢個價錢，仲要有雞食，真心平靚正！呢到嘅食材新鮮，唔會覺得係隔夜、餸頭餸尾，雖然唔算得上係高級，但呢個價錢絕對係超出水準👍🏾黎開附近嘅不妨黎一試😋餐廳主人仲養左隻狗狗勁得意勁嘆😂😂😂