生昌潮州海鮮酒家

星期五嘅晚上，我同男朋友去咗大圍田心警署對面呢間大排檔食飯。如果有揸車嘅話都算幾方便，旁邊有個爛地停車場可以泊車，不過可能星期五嘅關係車位滿晒，最後我哋都係冇得選擇之下泊街就算。而且呢個大排檔亦都適合吸煙人士，因為坐露天嘅位置係可以食煙。我哋只係叫咗三個餸，因為得兩個人食都怕食唔哂，呢間大排檔嘅嘢出名全部都係大大碟。

首先叫咗個咕嚕肉，當然就係好大碟啦，但確實係色香味俱全。仲有蒜蓉蒸開邊蝦，仲有粉絲係底，啲粉絲勁入味撈飯超好食。再叫多個腐乳通菜，菜係最失色嘅，因為完全唔夠腐乳味。

埋單三百幾蚊，當然就唔算係平，不過三個餸都咁大碟都算抵食嘅。