平昌 Premium (已結業)

話說都好耐無食韓燒，又咁岩係佐敦拍拖，咁就上左黎呢間韓燒度試試佢，重點係平啊麻！首先黎既就係五花腩肉，呢份五花腩唔洗講都見到勁厚身，雖然只有４件，但份量十分之多，燒到仆仆脆勁好味。之後就到呢一個頂級牛肉，唔好睇佢好似好多肥肉咁，其實呢一份牛肉既特點係佢既油份被迫出黎後，係極之咁香，令到成個肉質升華左。記住五花腩一定要燒到仆仆脆先好食，同埋職員哥哥仲好好人咁提我地，唔洗反咁多次，見到佢一面金黃色先至反另外一面，黎食既朋友仔記得留意，唔好係咁反佢啦，好易痴底的！有４款醬油，不過我地都係最鐘意右１果隻，酸酸甜甜好開胃。黎到主菜海神湯啦，呢一個海神湯可以話係冬天既寶物，飲完之後有暖胃既感覺。可能係因為佢本身係一個人參雞湯做底，再加上極豐富既海鮮，包括大大隻既鮑魚，八爪魚，以及好多蜆仔。都令到個湯好鮮味，唔單只有人參既甘甜味，仲有海鮮同雞湯既鮮味。唔記得講，呢一個湯只係叫左半份，都已經夠我地２個人食，所以大家可以就番個份量叫。