籽樂廚房 (已結業)

同幾朋友一齊食飯吹下水，係呢個暗黑敗壞嘅時代，想暢談政治都要搵個安全嘅地方。我地點左三個單人set dinner 。2個安格斯牛肉漢堡1個黑松露雜菇忌廉意大利飯全部都大大份，每一set都包埋沙律麵包餐湯甜品嘢飲。其實真係大份到食唔晒。但係唔知有冇最低消費，所以都係一人叫咗一份，其實三個人食兩份都好夠。味道上面都叫唔錯。Parma ham 沙律幾好食，個汁偏甜，友人好鐘意，而我個人喜歡酸d。蕃茄餐湯好重蕃茄味，加埋少少黑椒就啱啱好。牛漢堡有得揀幾成熟，大大份，牛味都ok，但未叫好濃。跟餐薯條，好爽脆，不過其實都係偏甜，如果有得跟沙律醬或者係芥茉醬就一百分啦。黑松露雜菇忌廉意大利飯，其實味道幾濃郁，又有好多菇，好滿足。好可惜嘅係個飯煮得太淋。無左意大利飯口感。最後甜品不過不失， 似係放題個d款嘅甜品，browny 同cheese cake 都係正常，泡芙就麻麻喇。總括黎講都唔錯！仲有得用下手語同侍應溝通，侍應又快手又helpful 又nice ，感覺好不錯。