The Right Place (舊墟直街) (已結業)

今日同女朋友去左大埔超級城行街，因為超市大減價既關係周圍都勁多人，想搵野食都難，女朋友就話不如行去舊墟果邊覓食啦，佢話睇過果邊成日都有好多好野食想試，咁去到直街呢面見到呢間The Right Place裝修幾靚感覺幾chill就入去試，水準果然唔錯。首先叫左兩杯飲品，分別係Dr. Kitty同埋士多啤梨梳打，兩杯都好有特色，Dr. Kitty唔算好甜好啱我，荔枝味同芒果味好香濃。跟住叫左香煎鵝肝多士伴無花果，鵝肝煎得好香，同埋好厚肉，雖然好邪惡但係真係好好食，好食到想叫多幾份😅多士吸哂鵝肝d油真係好鬼正。跟住叫左12小時低溫慢煮烤豬件伴椰菜仔同薯條。隻豬仔脾皮好脆，肉嫩多汁肉質一流，特別好鐘意佢有陣陣既香烤味，配菜椰菜仔估唔到都好爽甜，連配菜都處理得好好，抵讚👍最後當然係甜品綠茶心太軟配士多啤梨雪糕，呢個心太軟真係食得到有陣陣既綠茶香味，好香濃好正，自家制既士多啤梨雪糕少少甜唔酸，味道啱啱好。食完呢餐，大埔區又多一間我的食堂喇