The Right Place (舊墟直街) (已結業)

今日入大埔探朋友，夜晚朋友帶我去舊墟 食西餐， 呢條街都幾多好嘢食， 之前都喺呢度附近食過幾次放題， 佢唔講我都冇為意原來呢度有一間酒吧西餐， 仲要係m1 group旗下， 呢個集團嘅西餐之前都食過幾次，質素同環境都非常好性價比較高。 餐廳入面地方雖然唔大但係仍然全場爆滿。 餐廳入面環境燈光好浪漫， 好適合喺度飲多兩杯傾下偈！澳洲和牛芝士意粉拌溫泉蛋$138 ， 呢個意粉好得意，話長唔長話短又唔短， 生熟程度煮到啱啱好， 意粉質地唔會過淋， 澳洲和牛粒又幾香牛味， 加埋溫泉蛋非常creamy！另外叫咗個美國安格斯牛肉煎蛋漢堡拌薯條$128， 個麵包外脆內軟， 牛肉夠厚身又juicy，非常正！食飽就叫多個甜品，叫咗個香蕉酥拌開心果雪糕， 開心果雪糕超香，又滑，入面真係有粒粒開心果， 原來係自家製架，夾埋小甜嘅香蕉酥非常配合！唔飲酒嘅我見到隔離枱叫咗一杯cocktail好得意，個造型係用一個蒸籠，上面放咗茶壺同茶杯，超靚。 可惜我唔飲酒只能夠叫杯凍咖啡，睇住人哋享受， 不過我杯凍mocha都好好飲，又唔會太甜！