沙嗲王 (已結業)

好朋友兼好大佬是晚約左一齊食飯，問我係旺角食咩好，最怕人問我係旺角食咩好架啦，我就非常之懶得諗咁話去沙嗲王算啦。原本約左七點到，不過我遲大到，佢又鬼咁早黎到，我就叫佢上黎搵位先啦，隔左一陣就話我知有檯，我諗佢大概等左十幾分鐘到掛。不過到我八點出現既時候，沙嗲王既門口簡直多人等位到不得了，想搵位攝入去都有難度!呢度既環境一向覺得唔差的，雖然同隔離檯有dd迫，不過旺角寸金呎土係咁上下架啦。兩個人都叫左幾多野食，首先通常每次必叫既就係白咖哩豬扒飯，是晚覺得依舊好食。最鍾意佢個汁好香椰汁味又唔會太辣，要黎撈飯好好味，豬扒依舊香口好吃，一D都唔靱~~另外叫左個白汁蘑菇意粉 (Carbonara個friend)，不過是晚掛住傾計，我丟低左佢好耐先食，所以結果.... 變到唔係太好食，因為D芝士已經硬哂，意粉又凍哂咁... 所以我唔敢亂評論，因為絕對係我既問題，相信趁熱食唔會太難食掛。另外小食叫左蒜蓉牛油雞翼，呢個係我幾乎每次黎都會必點既食物之一，係我同哥哥既最愛~~ 我地係第二度食覺得永遠都唔夠呢度好食的。因為佢真係炸得好脆口(雖然都好熱氣)，個表帶有少少蒜味，內裡肉質嫩滑又有牛油味，食極都唔厭。