Posto Pubblico (已結業)

好食嘅餐廳仲係坐落係難去嘅地方，呢一間值得推介嘅意大利餐廳亦都一樣喺中環搭住扶手電梯去到伊利近街轉右就搵到佢嘅。呢間餐廳每樣食物都令我感到驚喜。首先佢個麵包係好特別嘅意大利頭盤麵包，麵包中間夾住空氣咁樣落去炸，如果佢係任食麵包，我諗我真係食到三四round而沙律亦都同樣有驚喜，份量真係非常之大，基本上係西餐廳一般成個沙律餐咁大嘅份量。我哋仲叫咗一個肉丸小食，食得出佢係餐廳自己製造，好新鮮，唔係嗰啲凍肉舖買返嚟好實淨嗰啲肉丸。食完呢三樣嘢基本上我都已經飽咗八成終於嚟到主菜啦，我叫咗一個蜆肉闊條麵，朋友叫咗一個蘑菇pizza，闊條麵嘅份量我覺得啱啱好，麵煮到啱啱好，加上白酒同埋蜆肉嘅調味，鮮味相當之突出。Pizza跟上碟嘅係一個啱啱出爐嘅鑊，我覺得Pizza其實只要夠熱就已經贏咗其他餐廳九條街，呢方面佢真係做得相當出色，雖然我已經食到好飽，但係都攞咗一塊嚟食，麵包入口鬆軟，上面嘅蘑菇都調味調得好夠最後更加要講下佢哋跟餐餸嘅甜品，曲奇餅絕對拍得住出邊要俾錢買嗰啲資素！整體來講，呢個位置呢個價錢比到咁嘅質素真係相當之值得一試再試