大盛日本料理 (已結業)

星期六晚, 陰差陽錯之下撞左入呢間港式日本料理. 接近十點去到, 有位, 不過要搭檯, 好嘈, 環境好麻麻.據一位烚下烚下既waiter所講, 此店只得菊正宗一種凍sake (都唔知係真唔係, 是但啦), $50一枝(300ml), 都算平, x2.見牆上面貼左好多剪報, 介紹果度既壽司, 主要以大為賣點, 我地點左4款. 基本上紫菜腍左, 飯粒好硬, 一夾就散, 但d料就真係有驚喜. 以佢既價錢黎講($1x-2x/2 pcs), 帶子、三文魚碎同三文魚子都好食得過, 鰻魚就乾、硬、凍, 唔掂.土佐豆腐出奇地幾好味, 不過好鬼大件, 成座山咁; 蟹籽沙律又係, 其實幾嚇人, 唔知$18定$22, 唔知講咩好.雜錦天婦羅有2隻蝦同5件瓜菜類, $38. 粉漿唔會好厚, 睇落同食落都唔油膩. 串燒墨魚咀同雞軟骨, 面頭灑左少少黑椒同鹽, 算幾香口, 雞軟骨好脆.最唔掂係個「魚安」「魚康」魚肝, 完全唔對路, 千祈唔好叫.總括黎講, 食物水準唔算高, 但以佢既價錢黎衡量既話, 部分dishes就真係有驚喜. 我地埋單$360 for two, 算貴喇, 隔離兩pair人都唔駛$200就落到樓