板上 (中海日升中心) (已結業)

夜晚響觀塘開餐，好多選擇，今次都係去地舖，不過係響個商場入面，門面裝修光猛。就咁睇個名，以為呢間係食日本嘢，但其實有相當多選擇：日式嘅飯，仲有漢堡，不得不提有個coffee bar， 可以嘆杯靚咖啡，仲有好精緻嘅蛋糕，可惜撞正晚飯時間，要醫肚先，唯有下次先去嘆coffee喇。餐廳係快餐店形式，先在門口落單，然後拎號碼籌等，叫號碼攞餐，然後自己搵位開餐。今日叫咗個黑豚漢堡配脆薯皇，漢堡包即叫即製，要花些少時間等，但等係值得嘅，因為新鮮做出嚟嘅漢堡包果然與眾不同，麵包烘到香脆，中間夾住嘅豚肉香味四溢， 調味偏甜，令到成個包嘅味道更加特別。除咗黑豚肉，仲夾咗大量嘅蔬菜同埋芝士。除咗漢堡包係即叫即製，脆薯皇都係新鮮炸起，外面香脆，內裏充滿豐滿嘅薯蓉，簡直冇得頂，當然同樣份量都係十足，唔怕餓親。飲品係巨峰乳酸梳打，雖然係少冰，但其實都幾多，唔使擔心唔夠凍。味道幾甜，相對提子味唔係太突出。如果鍾意同朋友聚一聚，叫杯啤酒都得，而且環境唔錯，空間感充足，唔係坐到密質質嗰隻，都啱三四個人一齊嚟傾下偈。一個餐加杯嘢飲，總數68蚊，免加一，呢餐晚餐都幾抵！