老厝邊

营业中

休息中

又到放lunch時候，同事話要帶我去食好食到暈嘅蛋餅，見同事咁誠意拳拳邀請我, 我亦卻之不恭，跟住同事食好西。《老厝邊》 ，台語「老鄰居」嘅意思 。餐廳主打古早味台式料理，店內裝修亦令我有種夢回當年喺九份老街食嘢嘅感覺。由於同事自稱係小鳥胃，所以兩個人只點咗牛肉麵、蛋餅、小食各一，以及兩杯嘢飲。「半筋半肉麵」 有紅燒或麻辣兩款湯底可以選擇，或者將佢變成蔥油拌麵亦得，得咗。雖然平日嘅我係清湯派，但正所謂人菜癮還大，最後都係選擇咗麻辣湯，湯底相當濃郁，亦唔會太辣，如果係同為清湯派的可以一試。配菜方面不論係筋或者牛腱就連蘿蔔都煮得相當入味，亦夠腍，不錯。「起司肉鬆蛋餅」 同事心心念念嘅食物，同時亦係舖頭招牌之一。蛋餅入邊係滿滿嘅肉鬆同可以拉絲嘅芝士，加埋被同事稱為令蛋餅提升一個境界嘅靈魂醬汁--蒜味醬油，醬汁沒有蓋過肉鬆同芝士嘅香之餘，仲令蛋香更為突出，有別於一般用鹹口醬油膏嘅蛋餅，確有驚喜。「酥炸魷魚」 個人認為相當出色嘅一道小食，粉漿唔會太厚，食落相當鬆脆又唔會油膩，加上炸得酥脆嘅九層塔，正。如果唔係仲要返工，真係想再嗌多一碟+2罐啤酒同同事啤啤佢。