八章軍 (啟岸) (已結業)

知道呢邊開左好多食店，今日收工得閒特登過黎睇下啦，但因為都9點，輕食嘅得返呢間有開，咁就試下啦。叫左青蔥口味，等左3分鐘左右已經有，咁我就走左去附近公園坐低食啦，一咬！個口感咁怪嘅？一睇，粉紅色嘅？水魷黎架喎！我以為睇錯啦，特登撩一粒出黎試，嘩我以為自己打緊邊爐啊🤦🏻‍♂️算啦都買左，都要食架，點知愈食愈唔對路，成口油味，仲要成個盒底都係油，原來青蔥口味佢竟然係面淋左層熟油！我知佢係打「迎合香港人口味」旗號，但你又水魷又蔥油咁地道嘅，不如係門口貼出黎警告下人先。補多句，個粉漿淨係得粉，乜野椰菜果啲全部都無，仲衰過X船。因為夜晚得街燈，盡左力影俾大家睇。