古今

营业中

休息中

朋友轉咗工，嚟咗銅鑼灣返工，所以特登出嚟搵去食晚餐。之前喺尖沙咀食過，都幾好食，所以今次都帶佢嚟呢間。今次都繼續揀佢個攞咗獎嘅燒牛舌，個牛舌真係好林，點埋佢個柚子醬真係好清新。然後我哋仲揀咗個櫻花蝦燒茄子，平時蒜蓉燒茄子就食得多，鋪晒滿滿嘅櫻花蝦都係第一次。一上枱嘅時候已經聞到好香嘅櫻花蝦味道。佢個茄子都好清甜，不過食落佢個櫻花蝦汁就咸咗少少。然後我哋揀咗兩款卷物，分別係煙花同埋超級龍捲風，佢將兩份卷物放埋左一齊，又擺得幾靚嘅。個煙花其實係辣味吞拿魚蓉加芝士喺面，不過呢度嘅芝士就唔係好食得出。然後中間嘅係辣味三文魚，都幾好食。另外個超級龍捲風就犀利啦，除咗有海老天婦羅之外，中間仲有鰻魚。而家呢一個嘅芝士味就濃啲，再加埋青瓜同埋翠瓜幾清爽口感，成件事好豐富但又唔會好漏。