師傅都係第一次黎呢間食店, 所以都唔知有咩好食, 睇左一陣, 見到呢期推介有呢個墨西哥香辣鮮堡, 既然如此, 就試一試; 行到去售票處, 就柯打左呢個墨西哥香辣鮮堡, 再配上芝士煙肉焗薯皮, 再跟杯汽水!
呢間食店嘅好處就係落完單唔使自己去攞, 而係有伙計攞埋你, 正! 等左一陣就有得食, 二話不說即刻開餐, 先講下個墨西哥香辣鮮堡, 份量真係唔算好大, 入口味道都幾好, 酸酸辣辣, 都幾惹味, 不過師傅覺得可以惹味d, 配埋生菜幾爽口, 而漢堡都幾鬆身, 但唔夠香, 可以接受啦; 而芝士煙肉焗薯皮就有兩件, 芝士份量洽到好處, 配埋煙肉粒喺面, 香香脆脆, 幾吸引喎, 而薯皮焗到熱辣辣, 薯仔味夠而且薯皮唔會過腍或過硬, 得喎!
總括黎講師傅覺得薯皮比墨西哥香辣鮮堡更掂, 服務態度都幾好, 而環境都算舒服, 價錢就唔平, 四十二蚊個飽, 加十蚊先有個餐, 咁樣食一餐要成五十二蚊, 未算抵食; 而眾友人對食物嘅感覺都係普通, 未見得特別出位, 反而對佢杯凍檸茶有少少意見, 話說凍檸茶跟餐係要加錢, 但加左錢後嘅份量其少, 冰反而勁多, 好似真係有少少搵笨, 有相為証架! 仲有冇下次, 師傅就唔會冇黎, 笑臉真係比唔到呀!
