京林屋 (已搬遷) 新店位置

下午六點鐘去到，諗住臨近晚飯時候，應該會少啲人，但都有十個人排梗隊，等咗半個鐘，終於入到去喇！京林屋嘅食品都會加入牛奶，調和茶味，令茶嘅甘香淡咗。作為牛奶控同抹茶控嘅Ss,當然好歡迎，因為Ss兩範都好ok。而Ss男友平時唔太特別喜好抹茶嘅，都like,覺得個味道mild啲。焙茶啫喱其實冇乜味，配堆雪糕食，多個口感。睇相就見到內容豐富！有抹茶雪糕、白玉、紅豆、寒天、蕨餅、生茶啫哩等，每樣少少，已經湊成一大份，食完都好飽肚。抹茶雪糕，加入牛奶，充滿牛奶香味，令雪糕更滑。蕨餅比想像中有口感，有少少嚼勁，但冇想像中好食，比較普通。其實總體水準唔錯，但冇咩好特出 ，試完未有好滿足嘅感覺。京林屋嘅環境比起中村一定係冇得比，要海景冇，要空間冇，不過卻一室日本裝潢，幾雅致。但講到最like 嘅係等候時間，半個鐘其實唔算短，但係半個鐘係等唔到中村，多個選擇真好！