スーパー丼 (大埔超級城) (已結業)

收工想買外賣返屋企，本身唔知食乜好，行行吓見到有間裝修好光猛好大嘅日式店就去睇吓有咩食。呢間叫得Super丼，明符其實就係做唔同嘅丼飯，有熟食同魚生飯，就咁睇選擇都好多，而且每一個飯都有得跟餐時間關係叫咗一個鵝肝和牛飯（$98）餐連一個麵豉湯同埋前菜。呢個真係好好食！和牛都有滿滿嘅一層，一啲都唔韌，配埋個汁好好食！重點係鵝肝都唔細舊，同埋好香，撈埋入啲飯度配埋和牛嘅肉味，成個飯真係好鮮好惹味😍另外都叫咗個藍旗中拖羅加吞拿魚腩蓉刺身飯（$148），拖羅十分新鮮，亦都好厚切，而且個吞拿魚茸非常非常香！撈埋一齊，一食落口係有油香味發出黎嘅感覺，好飽肚。跟餐嘅麵豉湯同前菜不過不失。不過我覺得呢間亦都真係對得起呢個價錢，因為的確係新鮮嘅魚生飯，仲要份量都幾多下。和牛飯更加係抵食添！以一個人食一碗飯來講，一餐絕對好飽肚同埋好滿足。外賣包裝亦都好企理。疫情關係無試到堂食，但見佢環境都唔錯，我個人係認為值得encore嘅。