彩虹小食串燒專門店 (已搬遷) 新店位置

第五波疫情咁爆，有唔少食肆直情唔開，真係搵食艱難！因為響網上外賣平台落單，價錢唔特別標注。外賣大概半個鐘送到，賣相唔錯，食物仲熱仲脆，味道唔錯，整體感覺幾好。初戀芝士撞棍（圖上中）係響鈴上面放芝士再炙燒，幾正喎！包皮包雞包皮卷（圖下右）係用雞皮包住免治雞肉及筍之類，唔係好脆皮，有少少失望。我覺得私伙雞皮串 脆卜卜仲好食啲；而免治雞肉軟骨棒配日本宮崎蛋黃醬汁都好食過包皮卷。其他串燒叫左燒菠蘿，幾厚身，夠Juicy；燒墨魚丸彈牙，表面搽左醬汁幾好味；燒雞泡魚乾味道略甜，燒豆卜，燒翠玉瓜正正常常。椒鹽類點了雞軟骨及香脆雞中翼，雞軟骨算多，雞翼有陣酥香牛油味，朋友覺得太膩，我就好鍾意。叫左個牛油芝士焗娃娃菜，邪惡又好味，不過芝士響面層，底層既菜只係食到蒜香味，都好味。因為驚淨食串燒唔夠飽就叫左個厚切牛脷便當，四大塊牛脷夠腍，入口有少少溶化，如果醬汁多少少入味啲會更正！但原來啲芝士野同炸野都幾飽肚關係，個飯只係食左面層有飯素撈果啲，實在有點浪費（飯既份量都幾多）。建議大家如果想食串燒為主可以唔使叫飯，或者叫左飯就可以加一兩串串燒當小食已經夠。