金記冰室 (康怡廣場北座) (已結業)

第三波疫情來勢洶洶，搞到人心惶惶。但香港人見慣大場面，處變不驚。有飯食飯，有粥食粥，靈活變通，有堂食就堂食，冇堂食就外賣。現在全民備戰，打疫境波，外賣暫時變了主流。呢波疫情更嚴峻，搞到全線禁止堂食，只能外賣。餐廳飲食業艱苦經營，作為香港市民一份子，絕對支持飲食業渡過難關，所以冇堂食就外賣，幫得幾多得幾多。金記冰室向來是小弟飯堂，勝在食品選擇多，質素穩定，價錢經濟實惠。疫情期間，外賣晚市套餐五點就開始供應，外賣自取更有七七折，真係超值。晚市套餐有9款選擇 ，外賣了兩個晚市套餐馬來咖哩牛腩飯和甜酸菠蘿生炒骨配白飯，送例湯及餐飲。例湯天天新款，星期一至日有七款不同清熱健脾老火湯供應。馬來咖哩牛腩，咖哩夠香帶微辣，牛腩件件肥瘦適中，牛味濃郁，筋膜部分一樣燘得軟腍，配搭的薯仔滲滿咖哩味道，十分惹味。甜酸菠蘿生炒骨，味道酸酸甜甜，酸甜度調較適中，很開胃。經炸過的排骨很香口，但稍嫌排骨瘦了點，如果多點脂肪，就更完美。是日例湯是合掌瓜山藥薏仁湯，湯底相當清甜，健脾去濕，又補中益氣，喝了一碗，感覺意猶未盡。七七折晚市套餐，除咗例湯和主菜，還包餐飲熱奶茶和熱檸蜜，真是錦上添花，抵食夾大件！