六叔燒鵝 (已結業)

晚市禁堂食，加上要留家抗疫，所以呢輪晚晚淨係諗煮乜嘢餸都諗到頭都大晒。今日要嚟土瓜灣做嘢，走嘅時候順就便喺附近斬料返屋做餸。記得之前同朋友幫襯過馬頭角道嗰間「六叔燒鵝」，店舖嘅燒味水準唔錯，皆因店中自設工場，所有嘅燒臘都係即場燒製，每日新鮮出爐，今日就一於番兜。櫥窗掛滿各式各樣嘅燒味，除咗主打嘅燒鵝，仲有切雞同骨腩，另外檯面亦擺放了不少滷味，例如鵝掌翼、豬脷等，真係令人垂涎欲滴。上次堂食，品嚐過餐廳嘅馳名燒鵝同四寶飯，今次就試下佢哋嘅脆皮燒腩仔 ($128/斤)。睇下盒燒腩仔嘅賣相幾吸引，肥瘦相間，脂肪比例亦啱啱好，食落肉嫩有嚼勁，而且拎到返屋企外皮依然脆卜卜，肉質油香帶滑，滑中帶煙韌，建議蘸少許黃芥辣同吃，更添美味。其實佢哋嘅叉燒都非常抵食，買一斤加 $1 送例牌燒鵝一份，夠曬經濟實惠。