大家樂 (新世紀廣場)

营业中

休息中

見到張Poster確係好吸引【香草鹽烤雞。超值二人套餐】，一隻雞，一客標準SIZE肉醬意粉，兩支牛油栗米，兩杯汽水。等左成10分鐘先有，係呢10分鐘裏面，我對呢隻雞充滿住無限既幻想，不過，始終係連鎖快餐店，亦唔會期望過高，但作為一位升斗小民，都有最升斗既要求，就係食物要應熱得熱，應凍得凍，上枱時要企企理理，就算係冰鮮既野，只要處理得好，都可以好好味。講返呢隻雞，係冰鮮既就肯定，個外表睇落去好掂，啲皮仲好脆，但個肉就唔多掂，有好大既雪味，仲有一絲絲既雞腥味，同埋非常之鞋口及脢，切開入面有一大堆灰黑色野，我相信係調味料，但個買相好肉酸，似內臟，呢一餐可以話係硬食落下，個肉醬意粉同牛油栗米味道標準，成個套餐$88算係好抵食，但以呢個質素，請我都唔食。