外婆酸辣粉-辣酒米線專門店 (已結業)

之前睇到朋友面書，見到有碗酸辣粉相當吸引，喜愛食辣既我，趁今日星期六放假，就一於黎試下啦。位於葵涌道既外婆酸辣粉，由葵興地鐵站行過黎都要7-8分鐘，舖位唔算大，大約廿個位。餐牌上有飯有粉揀，亦可以選擇套餐，附有小食及飲品。最後我地決定叫左兩個套餐。外婆酸辣粉 :黎到呢度，梗係要試下招牌菜。薯粉配上花生，榨菜同蔥花，薯粉吸收左酸辣湯後，非常惹味，簡單既配料唔會破壞酸辣粉既味道。四川雜醬麵 :開頭以為會係撈麵，黎到先發覺原來係湯麵加四川肉醬，湯麵麵質彈牙，唔會煮到太淋，而湯亦無酸辣粉咁辣，配埋肉醬味道剛剛好。口水雞 :每次食川菜都一定會食，呢度既口水雞雞肉夠滑，但略嫌唔係太夠麻辣，味道可以再重少少。另外可能係跟餐關係，份量都唔算太多。泡椒鳳爪 :自製既泡椒醃既鳳爪，未食之前以為味道好似泰式鳳爪咁，但一食就覺得辣好多，同一般麻辣唔同，而辣味仲係慢慢涉出黎添。涼拌青瓜海蜇 :原本想叫紅油抄手，可惜已經售罄，所以轉左揀呢樣小食，海蜇夠爽口，而青瓜亦好新鮮，配埋辣汁食份外好味。