壹級日本料理 (已結業)

美林邨係一個陌生嘅地方，真係完全未去過。但係我一條友，無可能要人地一家人有大有細就我架，所以行遠d都無計嘅。呢間日本餐廳剛剛新開，還在試業階段，雖然佢嘅裝修未完全整好，但係地方都十分之寬敞，坐落去都好舒服。入邊除咗會有刺身，壽司之外，仲會有串燒，鍋物，種類都幾多。先講一講刺身，估唔到呢度嘅刺身除咗有最常見嘅三文魚，赤貝，帶子之外，仲會有最好食嘅刺身拖羅。今次大拖羅，中拖羅同埋赤身，我哋都有叫。個人覺得最好食嘅係中拖羅，入口啖啖油脂的美感，入口即溶。大拖羅嘅油脂雖然比中拖羅勁，亦美味，但係就會有少少根。除咗壽司之外，佢嘅串燒亦都係值得一題，特別就係佢呢個串燒黑豚腩，個人一向都係鍾意食牛牛多啲，但係呢一個黑豚腩確實係比牛肉更加優勝，咬落去有濃香嘅豬味。燒粟米都係必吃之選，食串唔一定要食肉嘅，有陣時蔬菜比肉類有勝之而無不及。燒粟米嘅時候再加埋牛油，令甜味更加提升。番薯天婦羅，呢度嘅番薯係用咗日本嘅紫心番薯，切薄片然之後加天婦羅脆漿再去炸。吃落又香又甜又好吃。雖然還在試業階段，有好多嘅菜式，味道還在調較中，但已經十分之不錯，等待真正開業時再來試試。